Juventus Coach Sarri cu zohchia tuk Ronaldo ruangah soisel a tong

Tuni 15 November 2019 ah Portugal le Lithuania cu UEFA Euro Qualifiers zuamnak an chuih i; Portugal nih 6:0 in an tei hna.Portugal le Lithuania puaiah Ronaldo nih Hattrick a tuah khawh.

Kum 34 asi cangmi Ronaldo nih Hattrick a tuah khawh caah voi 35nak hattrick a tuah cangmi a hung si. Portugal caah goal 98 a ngeimi zong asi. Ronaldo hi 2019 chung lawngah Goal 13 a ngei cangmi asi.

 

Juventus coach hlun Alegri nih Ronaldo hi voikhat hmanh a rak thleng bal loh nain Sarri nih cun ICC zuamnak, Champion League zuamnak le Serie A zuamnak puaiah a thlen lengmang.

 

Juventus le AC Milan puaiah Ronaldo cu Sarri nih a rak thlen than i; thinhun buin a rak chuak. “Ronaldo hi a khup a fah pah caah dinhnak caan tha pek ka duh i; ka thlennak” asi tiin a thlennak ruang a chim.

Nain, Sarri chimmi cu Portugal coach nih a cohlang loh. Ronaldo hi normal asi ko tiin a chim. Ronaldo le Juventus coach Sarri kar lakah i rem lo nak a chuah lioah Ronaldo nih Portugal caah Hattrick a tuah caah Portugal Coach cu thangthat a tong ngai. Sarri nih Ronaldo hi a hman a thiam loh tiin Sarri cu soisel a tong ngai.