US le Iran buainak nih Ralpi pathumnak a chuah ter kho lai ma?

President Trump nih Iran Ralbawi a thah ruang ah WW3 a chuak kho tiah a thin a dawmmi tampi an um i, nihin news hna ahcun Datsi man zong ceilak a kai tiah an ti. Iraq le Iran ah nitlai rammi khualtlawng vialte a rannak in chuah dingin ralrin an pek cio hna. Trump nih a ralkap tampi cu Kuwait ram ah a kuat hna i, Iraq kiangkap rili ah ready bak in a chiah cang hna. Iran nih teirul ka cham hrim lai tiah aa hrocerh i, Trump nih U.S ngeihmi or U.S hmunhma an tongh cikcek ahcun, Iran ram hmun biapi hmun 52 ka phawmh colh lai tiah a tlerh ve hna.

 

 

Trump nih Major General Qasem Soleimani a thahnak a ruang hi, hitihin aa thawk. Iran cozah nih an bawmhmi hna Iraq tapung (Iraq’s Popular Mobilization Forces) nih December 27 ahkhan U.S contrator an thah. Cu ruang ah December 29 ahkhan Trump nih Iraq tapung ( PMF) umnak a phawmh tthan ve i, hriamtlai 25 an thi. Cucaah, PMF ttanhtu pawl Iraqi pawl nih December 31 ahkhan Baghdad khuapi i U.S embassy cu an phawmh than ve. Reception hna an khangh i, Embassy riantuantu harnak an pek hna. Mah U.S Embassy dohnak ah hnuphen in thazaang petu hi Major General Qasem Soleimani hi a si tiah U.S nih an puh. Cucaah, January 3 ah Airport in a ttum i, Mawtawka pahnih Baghdad khuapi lei kal an ithawh ah Drone in an thah hi a si.

 

Major General Qasem Soleimani hi U.S cozah nih thah dingin an rak ngiarnak a sau cang. President Bush zong nih thah a rak duh cang. President Obama zong nih thah a rak duh cang. Asinain Major General Qasem Soleimani Iran lawng siloin Middleast ah minthang a si caah, an thah hnuah a rak chuak dingmi buainak ttih ah an rak tong ngam lomi a si. Syria a rak tlawn lio ah Israel nih an rak thah dengmang nain Obama nih a kham hna ruang ah an rak luatter bal. Hipa hi CIA le U.S intelligence nih a neh an zulh hna a sau cang i, US embassy le US ngeihmi thilri hrawh le dohnak ah hnuphen in a rak ttangtu a si tiah an chim.

Zeiruang bik ahdah Major General Qasem Soleimani hi US le Israel nih thah an duh peng ti a si ahcun, Soleimanian hi Islamic Revolutionary Guard Corps (IRGC)ah lutlai, Major General a si. IRGC hi Iran ralkap tangah Banch pakhat a si i an rianbik cu Iran ramri vennak lei ttuanvo latu an si.Iran ramri lawng siloin, anmah Islam biaknak a kilventu ralkap an si. Islam biaknak a kilvengtu an si caah, Middleast ah US le nitlak ram cawlcanghnak hram a phelhtu bu an si. Cun, Iraq ram in US ralkap an chuah bak in slamic Revolutionary Guard Corps (IRGC) hi an lut i, Iraq ram hi Iran kuttang ah chiah ding hma a la cuahmahmi an si fawn. Iraq ram ah hriamtlai, Iraq’s Popular Mobilization Forces timi bu zong hi anmah nih training an pek hna i, US rammi le US riantuannak paoh a dodaltu an si.

 

Trump nih Major General Qasem Soleimani a thah ahhin Iraq’s Popular Mobilization Forces ah deputy commander Abu Mahdi al-Muhandis zong an thah chih. A thimi dihlak hi minung 10 an si i, Abu Mahdi al-Muhandis a ralkap 4 le Qasem Soleimani a ralkap 4 an itel. Anmah pahnih hi 10 an thi.

Iran nih an iuar taktakmi Major General Qasem Soleimani an thahmi cu Iran cozah cu an thin a runh taktak. An supreme leader- Ali Khamenei nih ni 3 chung ttah dingin a rammi a fial hna. Teirul kan cham hrimhrim lai tiah an ihrocer. Zei dirhmun dah an phak te lai. Zoh rihko hna usih! Credit: Zasang