Dagon Seikkan pawngmuk sehzung kong thawngfiang

 

 

Yangon, Dagon Seikkan, Ward 87, Maggin Street ah a ummi pawngmuk le pohsi sernak sehzung ah sehzung ngeitu nih riantuantu ngakchia a hrem hna timi kongah sehzung pawngah November 19 zan le 20 zan ah mibu sernak a um caah palek nih an thawl hna i mibu nih an keh ve hna caah palek cheukhat hliam an tuar i siizung ah kalpi an si, inn le mawtaw zong a rawkmi an um tiah theih a si.

 

 

 

 

 

 

 

Hi buainak aa thokning cu, November 17 zanlai ah sehzung riantuantu Kyaw Lin Htun (kum 19) cu sehzung in a zaam. Cu hnu deuh ah a dang riantuantu Ko Kayin le Ko Sanshi zong an zam ve i an pathum in November 19 ni ah palek sakhan ah an va kal i report an va tuah. Cun sehzung chung i a ummi an unau 5 hna zong chuahter kan duh hna tiah an va chim.

Palek sin an kal hlan ah anmah lawngin sehzung hmai ah an va kal i an unau pawl chuahpiak awkah an va hal nain sehzung ngeitu nih a chuahpiak duh hna lo caah mibu nih an chuahhnawh hna.

 

 

 

 

Palek sin an chim hnu, November 20 zan ah khuabawi he sehzungah an va kal than i an unau pawl chuahpiak dingin an va hal than. Sehzung ngeitu nih a chuah duh hkei hna lo caah palek an ra. Cu hnu ah sehzung ngeitu nih an unau pawl cu a chuahpiak hna i a pek hna.

Cu tikah mibu an ra than i, riantuantu dang zong an um rih lai chuah dih hna tiah an hal. Sehzung ngeitu nih riantuantu minung 18 a chuahpiak hna. Mibu cu an lung a tling hlei rih ko. Cucaah palek le mibu aiawhtu nu pakhat sehzung chungah an lut in an va kawl nain an hmu lo. Mibu cu an lung a tling thiam lo i anmah tein isehzung chungah luh i va kawl an timh caah palwk nih an kham hna i, meithal puahnak tiang a um. Cu ahcun palek le mibu kar ah buainak a hung um i palek 6 hliam an tuar. Cu hnu ah mibu cu an tian.

 

 

 

 

Sehzung ngeitu Aung Kyaw Min le a nau pa cu an tlaih hna i halnak an tuah hna. Anmah hi tuluk cu an si lo nain tiluk biaknak a biami an si.

Atu hi tlamtling deuh in hlathlainak an tuah lio. Atu tiang theih khawhmi cu, riantuantu hremnak cu a um lo nain, kum tling lomi ngakchia riantuanternak le riantuantu pamhvawlnak in tazacuai an si i aamahkhan khawhmi a si.

 

 

 

 

 

Riantuantu thlahmi minung 18 lakah a ngakchia bik cu kum riat a si. Hi sehzung ah ‘ngakchia an thah hna i pawngmuk ah an ser hna’ timi biaholh zong mipi lakah chimceihmi a um nain thil fianglo ngai a si.

Riantuantu kha ‘innkhan chungah a erh hna’ timi cu cohlan khawhmi a si nain ‘a hrem hna’ timi kong cu hlathlai cuahmah a si.

 

 

 

 

 

 

DVB, Myanmar Now, Pyi Myanmar

 

Be the first to comment

Leave a Reply

Your email address will not be published.


*